कांग्रेस मकवानपुर जिल्ला सभापतिको लागि लामिछाने र पराजुलीको उम्मेद्वारी घोषणा

हेटौंडा । आईतबार हुने नेपाली कांग्रेस मकवानपुरको अधिवेशनमा जिल्ला सभापतिको लागि जयराम लामिछाने र आनन्द पराजुलीले उम्मेद्वारी घोषणा गरेका छन् । शुक्रबार दुबै जनाले हेटौंडामा छुट्टाछुट्टै पत्रकार सम्मेलन गर्दै जिल्ला नेतृत्वको लागि उम्मेद्वारी घोषणा गरेका हुन् ।

लामिछानेले सबै पदाधिकारीहरुको प्यानल घोषणा गरेका छन् । उनले आफ्नो प्यानलमा उपसभापतिमा आनन्द कठायत र धर्म लामिछाने, सचिवमा भीमसेन महत, इश्वर पाठक, सहसचिवमा इन्दिरा न्यौपाने र रत्न बहादुर गोलेले उम्मेदवारी रहने जानकारी दिए । कांग्रेसको विधान अनुसार उपसभापति, सचिव र सहसचिव दुई–दुईजना हुने व्यवस्था रहेको छ । उनले आफुले कांग्रेसले दिएका विभिन्न जिमेवारीमा रहेर काम गरेको र आफुले अब जिल्ला सभापति चलाउन सक्षम भएकाले उमेदवारी दिन लागेको बताए ।

प्यानल घोषणा गर्दै लामिछानेले विधि र विधानमा चल्नु पर्ने मान्यता राख्ने बताउँदै विजयी भएमा विजयी नहुने साथीहरूलाई सङ्गै लैजाने र पराजित भएको अवस्थामा विजयी साथीहरूसंगै मिलेर पार्टीको काम अघि बढाउने समेत प्रतिबद्धता व्यक्त गरे ।

उनले आफुमा जिल्लाका सबै स्थानीय तहका वडाहरुमा जिताउने क्षमता रहेकाले आफ्नो उम्मेदवारी रहेको र मकवानपुर कांग्रेसले आफ्नो नेतृत्व खोजेको स्पष्ट पारे । उनले आफुले गुटको राजनीति अन्त्य गर्न र विचारको राजनीति अघि बढाउन आफ्नो उम्मेद्वारी रहेको बताए । लामिछानेको प्यानल घोषणा कार्यक्रममा पूर्व जिल्ला सभापतिहरु माईकल रामचन्द्र अर्याल,रघुरमण न्यौपाने,कांग्रेस मकवानपुरकी नेतृ उमा दाहाल,रिता खनाल,कांग्रेस मकवानपुरका सचिव आनन्द कठायत लगाएतको सहभागिता रहेको थियो ।

यसैगरि,सभापतिका उम्मेद्वार आनन्द पराजुलीले आफु सभापति पदमा विजयी भएको अवस्थामा मकवानपुर जिल्लालाई कांग्रेसमय बनाउने दाबी गरे ।

उनले स्थानीय निर्वाच नजिकिदै गरेको बताउँदै निर्वाचनमा कांग्रेसलाई विजयी गराउने, जनताको सुख दुःखमा साथ दिने र विकास निर्माणमा सधै लागि पर्ने प्रतिवद्धता जनाए ।

‘कांग्रेसले जनतामाझ आफ्नो पार्टीको विचार स्थापित गर्न आवश्यक छ ।’, उनले भने, ‘विचारसँगसँगै विकासलाई पनि ध्यानमा राखेर जनतामाझ विकास निर्माणलाई समेत तीब्रता दिनेतर्फ मेरो ध्यये रहनेछ ।’ उनले बर्षौंदेखि आफुले मकवानपुरमा कांग्रेस बृद्धि हुनुमा पार्टीको विचार र जिल्लाको विकासलाई सँगैसँगै अघि बढाउन महत्वपूर्ण भूमिका निर्वाह गरेको दाबी गरे । उनले आफुलाई सहर बजारदेखि कुना कन्दराका कार्यकर्ताले खोजेको बेलामा भेट्ने र उनीहरुको समस्या समाधानका लागि हरदम लागि पर्ने प्रतिबद्धतासमेत व्यक्त गरे ।

पराजुलीले हेटौंडा उपमहानगरको मेयर बन्ने र पार्टी सभापतिको उम्मेदवार हुने विषयलाई लिएर भ्रम सिर्जना गर्नु गलत भएको र मेयर जनप्रतिनिधि हुने विषय र पार्टी सभापति विल्कुल फरक भएकोले जनतामाझ जाने र पार्टी नेतृत्वको बारे एउटै डालोमा हाल्न नमिल्ने धारणा राखे । ‘मेयर हुने विषयलाई पार्टी सभापतिमा ल्याएर जोड्न मिल्दैन ।’ उनले भने, ‘पार्टीले योग्य उम्मेदवारलाई मेयरको उम्मेदवार बनाउने छ, त्यहाँ म मात्र हुन्छु भन्ने होइन, अहिले पार्टीको चुनाव भएकोले यतामात्र केन्द्रीत हुन जरुरी छ ।’ उनले आफु सभापति भए, पार्टी विस्तारलाई व्यापक जोड दिँदै स्थानीय तह, प्रदेश र प्रतिनिधिसभामा कांग्रेस का उम्मेदवारलाई विजयी गराएर काँग्रेसको किल्ला बनाउने दृढता व्यक्त गरे ।

उनले आफुलाई कांग्रेसको केन्द्रीय सह–महामन्त्री महालक्ष्मी उपाध्याय डीना र कांग्रेस बागमती प्रदेश सभापति इन्द्रबहादुर बानियाँको समर्थन रहेको दाबी गरे । उमेदवारी घोषणा कार्यक्रममा उपाध्याय र बानियाँ सहभागि भएका थिएनन् । पराजुलीले आफ्नो प्यानल भने घोषणा गरेका छैनन् ।

पराजुलीको उम्मेदवारी घोषणा कार्यक्रममा कांग्रेस मकवानपुरका नेताहरु दामोदर खनाल, सुशान्त श्रेष्ठ, एतिराज सापकोटा, विश्वलाल लामा, राजवीर मोक्तान लगायतको सहभागिता रहेको थियो ।खबर ब्रेकबाट