मकवानपुर सहित देशभर अत्याधिक चिसो बढ्यो

हेटौंडा । गत शुक्रबार देखि मकवानपुर लगाएत देशभर चिसो ह्वात्तै बढेको छ । देशको विभिन्न स्थानमा गत शुक्रबार रातिदेखि शनिबार बिहानसम्म परेको वर्षा र हिमपात रोकिएपछि चिसो झन् बढेको हो ।

मकवानपुर सहित देशका धेरै ठाउँमा केही दिनदेखि राम्रोसँग घाम लाग्न सकेको छैन । बजार क्षेत्रहरुमा चहलपहल कम हुँदै गएको छ । चिसोका कारण वृद्धवृद्धा, बालबालिका र मजदुर धेरै समस्यामा परेका छन् ।

अत्याधिक चिसो बढेकोले नियमित कामकाजमा समेत प्रभाव परेको छ । आज बुधबार बिहान मकवानपुरको तापक्रम ७ डिग्री सेल्सियसमा झरेको थियो । बुधबार दिउँसो भने तापक्रम १५ डिग्री सेल्सियसमा रहेको छ ।

देशको मध्यपूर्वी तराईमा जाडो बढेसँंगै जनजीवन अत्यन्त कष्टकर बन्दै गएको छ ।

मङ्गलबार अपराह्नपछि घाम देखिन छाडेर लगातार तुसारो परेसँगै चिसो सिरेटो चलिरहेको छ। यसअघि गत शुक्रबार रातिदेखि शनिबार बिहानसम्म परेको पानीले बढाएको चिसो मङ्गलबार अपराह्नपछिको तुसारोसहितको सिरेटोले चिसो झनै बढाएको हो।