पुराना दललाई समानुपातिक सांसद छान्न सकस
काठमाडौँ – प्रतिनिधिसभा र प्रदेशसभातर्फ समानुपातिक सांसद छान्न पुराना दलहरूलाई सकस भएको छ । निर्वाचन आयोगमा नाम पठाउने अन्तिम दिन आज अधिकांश दलहरूले नामावली तयार गर्ने भएका छन् । प्रतिनिधिसभातर्फ ११० र प्रदेशसभातर्फ २२० जनाको नाम दलहरुबाट आयोगमा पेस गर्नुपर्ने संवैधानिक बाध्यताअनुसार दलहरु लागिपरेका हुन् ।
निर्वाचन आयोगले शनिबारसम्म समानुपातिक सांसदको नाम पठाउन भनेका कारण दलहरुले आजै नाम टुंग्याएर पठाउने तयारी गरिरहेका छन् । दलहरुले यसअघि आयोगमा बन्दसूची पठाए पनि नेतृत्वको तजबिजमा केही फेरबदल हुन सक्ने भए पछि आकांक्षीहरूले नेताहरुको घर र पार्टी कार्यालय घेरे पछि नेतृत्वलाई सकस परेको हो।
नेपाली कांग्रेस, नेकपा एमाले, माओवादी केन्द्र, जसपा, राप्रपा लगायतका पुराना दलले आज पार्टीको बैठक बोलाएका छन् । कांग्रेस सभापति शेरबहादुर देउवाले निर्वाचनपछि पहिलोपटक आज केन्द्रीय कार्यसम्पादन समितिको बैठक बोलाएका छन् । समानुपातिकतर्फ प्राप्त ३२ सांसदमध्ये कांग्रेसलाई आयोगले २९ जना महिला र तीनजना पुरुष सांसद पठाउन सूचित गरेको छ । त्यसैगरी कांग्रेसले प्रदेशमा १११ सांसदको टुंगो पनि आजै लगाउनेछ ।
यसैगरी पार्टीमा सांसद बदल्न दबाब बढेपछि समानुपातिक सांसद छनोट गर्न शुक्रबार बोलाइएको एमालेको सचिवालय बैठक अन्तिम समयमा आएर शनिबारका लागि स्थगित गरिएको थियो । एमालेले प्रतिनिधिसभामा ३४ सिट र प्रदेशमा ९१ सिट पाएको छ ।
नेकपा माओवादी केन्द्रको शुक्रबारको पदाधिकारी बैठक पनि समानुपातिक सांसदको अन्तिम सूची नटुंग्याएरै सकिएको थियो । पार्टी केन्द्रीय कार्यालय पेरिसडाँडामा बसेको पदाधिकारी बैठक समानुपातिक सूचीका विषयमा सरोकारवाला निकाय र कानुन विद्हरुसँग छलफल गरेर टुंगो लगाउने गरी सकिएको सचिव लीलामणि पोखरेलले जानकारी दिएका थिए । माओवादीले संघमा १४ सिट पाएको छ भने प्रदेशमा कुल २९ सिट पाएको छ ।
प्रतिनिधिसभामा थ्रेस होल्ड कटाउन नसकेर राष्ट्रिय पार्टी बन्न नसकेको एकीकृत समाजवादीले समानुपातिकतर्फ सातवटै प्रदेशमा गरी नौ सिट पाएको छ । प्रतिनिधिसभाको प्रत्यक्षतर्फ १० सिट जितेको एकीकृत समाजवादीले प्रदेशको समानुपातिक सांसद टुंग्याइसकेको छैन ।
जसपाको केन्द्रीय कार्यकारिणी समितिको बैठक पनि आजै बिहान बस्दैछ । जसपा केन्द्रीय कार्यकारिणी समितिको बैठकले समानुपातिकमा पाँचजना सांसद टुंग्याउने प्रचार विभाग प्रमुख पूर्णबहादुर बस्नेतले जानकारी दिएका छन् ।
समानुपातिकमा पनि सातै जना सांसद पाएको राष्ट्रिय प्रजातन्त्र पार्टीले पनि आजै बैठक बोलाएको छ ।
महन्थ ठाकुर नेतृत्वको लोसपाले राष्ट्रिय दलको मान्यता नपाए पनि प्रतिनिधिसभातर्फ चार सिट जितेको छ । उसले प्रदेशसभातर्फ मधेस प्रदेशमा दुई र लुम्बिनी प्रदेशमा एक गरी तीन जनाको नाम टुंगो लगाइसकेको छ ।
