हेटौंडा जेसीजद्वारा जेसिज सप्ताह–२०२५ विभिन्न कार्यक्रमसहित मनाइने
हेटौंडा । जेसिज सप्ताह–२०२५ को अवसरमा हेटौंडा जेसीजले सामाजिक तथा जनचेतनामूलक कार्यक्रमहरू सञ्चालन गर्ने भएको छ ।
आइतबार आयोजित पत्रकार सम्मेलनमा हेटौंडा जेसीजका अध्यक्ष पंकज दास बानियाँले कात्तिक १८ गतेदेखि २२ गतेसम्म सञ्चालन हुने सप्ताहव्यापी कार्यक्रमहरूको विवरण सार्वजनिक गरेका हुन ।
उनका अनुसार, सप्ताहको पहिलो दिन कात्तिक १८ गते बिहान ७ बजे हुप्रचौरमा रक्तदान कार्यक्रम आयोजना गरिनेछ । सोही दिन बिहान ८ः३० बजे स्लो बाइक प्रतियोगिता पनि सञ्चालन गरिनेछ ।
कात्तिक १९ गते बिहान ७ बजे अन्तर–जेसिज वक्तृत्वकला प्रतियोगिता आयोजना गरिनेछ भने दिउँसो २ बजे भूटनदेवी माध्यमिक विद्यालयमा साइबर सचेतना कार्यक्रम सञ्चालन गरिने जनाइएको छ ।
त्यसैगरी, कात्तिक २० गते विद्यालयस्तरीय हाजिरी–जवाफ प्रतियोगिता जेसीज सचिवालयमा हुनेछ, जसमा कक्षा १० सम्मका विद्यार्थीहरूले सहभागिता जनाउनेछन् ।
कात्तिक २१ गते मकवानपुरगढी–६, गुरदाङस्थित अति विपन्न परिवारलाई खाद्यान्न तथा लत्ताकपडा वितरण गरिनेछ ।
सप्ताहको अन्तिम दिन कात्तिक २२ गते समापन समारोहका क्रममा उत्कृष्ट सदस्य तथा उत्कृष्ट कार्यक्रम संयोजकलाई सम्मान तथा पुरस्कार वितरण गरिने अध्यक्ष बानियाँले जानकारी दिए ।
जेसीआई हेटौंडा सन् २०२५ का कार्यकारिणी उपाध्यक्ष सन्तोष पराजुली यस वर्षको जेसिज सप्ताहका मूल कार्यक्रम संयोजक रहेका छन्।
