मातृभाषामा समेत मतदाता शिक्षा प्रदान गरिँदै
हेटौँडा । फागुन २१ गते हुने प्रतिनिधिसभा निर्वाचनलाई लक्षित गर्दै बदर मत घटाउने तथा मतदातालाई मतदान प्रक्रियाबारे सुसूचित गराउने उद्देश्यले मकवानपुरका १०२ वटै वडामा मतदाता शिक्षा कार्यक्रम सञ्चालन गरिएको छ ।
प्रदेश निर्वाचन कार्यालयका अनुसार फागुन ३ गतेदेखि सुरु भएको कार्यक्रम फागुन १७ गतेसम्म सञ्चालन हुनेछ । प्रत्येक वडामा स्वयंसेवक परिचालन गरी घरदैलोमार्फत नमूना मतपत्र प्रयोग गरेर मतदाता शिक्षा प्रदान गरिँदै आएको छ। स्वयंसेवकले नेपाली भाषासँगै स्थानीय मातृभाषामा समेत शिक्षा दिइरहेका छन् ।
चेपाङ र तामाङ समुदायको बाहुल्यता रहेका क्षेत्रमा क्रमशः चेपाङ र थाहा तामाङ भाषामा मतदाता शिक्षा प्रदान गरिएको छ। मकवानपुर-२ अन्तर्गत पर्ने राक्सिराङ र कैलाश गाउँपालिकाका अधिकांश वडामा स्वयंसेवकले नेपालीसँगै चेपाङ भाषामा शिक्षा दिइरहेका छन् । त्यसैगरी थाहा नगरपालिकामा तामाङ भाषामा मतदाता शिक्षा सञ्चालन भइरहेको छ ।
कार्यक्रमको प्रभावकारी अनुगमनका लागि जिल्लाका १० वटै स्थानीय तहमा तालिमप्राप्त अनुगमनकर्ता खटाइएको जनाइएको छ । स्वयंसेवकले मतदाताको घरबस्ती तथा समुदायस्तरमै पुगेर नमूना मतपत्रमार्फत मतदान गर्ने सही तरिका, मतपत्रमा छाप लगाउने, पट्याउने तथा मतपेटिकामा खसाल्ने प्रक्रियासम्म सिकाइरहेका छन् ।
मतदान प्रक्रियालाई सहज, सरल र व्यवस्थित बनाउँदै बदर मत न्यून गर्ने उद्देश्यले कार्यक्रम सञ्चालन गरिएको प्रदेश निर्वाचन कार्यालय हेटौँडाका प्रमुख हरिप्रसाद ढकालले बताउनुभयो। उहाँका अनुसार २०७९ सालको प्रतिनिधिसभा निर्वाचनमा मकवानपुरमा ४ दशमलव ४६ प्रतिशत मत बदर भएको थियो । उम्मेदवार तथा राजनीतिक दलका प्रतिनिधिले पनि घरदैलो अभियानका क्रममा मतदान गर्ने तरिका सिकाए बदर मत थप घट्न सक्ने उहाँको भनाइ छ ।
दुई निर्वाचन क्षेत्र रहेको मकवानपुर–१ मा एक लाख ५८ हजार ४३५ मतदाता रहेका छन् भने मकवानपुर-२ मा एक लाख ५६ हजार ८९९ मतदाता छन् । जिल्लाको कुल मतदाता संख्या तीन लाख १५ हजार ३३४ पुगेको छ। तीमध्ये महिला मतदाता एक लाख ५३ हजार ३७६ तथा अन्य मतदाता पाँच जना रहेका छन्।
